index introductio imagines || partitura exemplar translatio

bibliographia e-mail

CTH 404.1.I

Exemplar --

Citatio: A. Mouton (ed.), hethiter.net/: CTH 404.1.I (Expl. --, 07.05.2012)

§ 1

1 -- [UMMA fMaštigga MUNUS URUKizzuwatn]a

2 -- mān=ašta [ABU] DUMU-RU=[ya našma LÚMUTUM DAM=ZU=ya] našma ŠEŠ NIN=ya ḫallu[wanzi]

3 -- n=aš kiššan aniyami

4 -- nu [kī da]ḫḫi

§ 2

5 -- 1 NINDA.GUR4.RA EMṢA UPNI 5 NINDA.SIG 1 NINDA.GUR4.RA KU7 tarnaš

6 -- […] 1 DUGNAMANDU Ì SERTUM pittalwan

7 -- 1 DUGNAMANDU Ì GIŠINBU GIŠPÈŠ GIŠGEŠTIN ḪÁD.DU.A

§ 3

8 -- NINDA EMṢU paraššulli 3 GA.KIN.AK TUR SÍG ZA.GÌN SÍG SA5 tepu

9 -- SÍGkišriš […]x-iš URUDUtēkan URUDUMAR URUDUtūri-[…] xḪÁ

§ 4

10 -- 2 ALAM GIŠ 1 GIŠŠÚ.A 1 GIŠBANŠUR … GIŠNÁ KUŠNÍG.BÀR

11 -- […] ZÌ-aš ZÌ.DA ZÍZ UPNU

12 -- ALAM ŠUḪÁ EMEḪÁ kue iyanzi

13 -- DUḪ.LÀL […] NA4nitri paršulli UZUSA

14 -- appuzzi MUN tarpatarpašSAR KU6 ḫarziyallaš

§ 5

15 -- 2 DUGÚTUL 2 DUGDÍLIM.GAL 2 DUGGAL 1 DUG A 1 DUGGÌR.KIŠ 7 [DUGḫu]puwai

16 -- 3 DUGKUKUB GEŠTIN 3 UDU BABBAR 1 UDU GE6 1 UR.TUR [1 ŠAḪ.TUR=ya?]

17 -- nu māḫḫan kī ḫandām[i]

§ 6

18 -- nu MUNUSŠU.GI 2 BĒL SÍSKUR ANA SÍSKUR tit[tanuzi?]

19 -- nu MUNUSŠU.GI 1 NINDA.GUR4.RA EMṢA ŠA UPNI 1 GA.KIN.AK 1 DUGKUKUB GEŠTIN dāi

20 -- n=at ANA BĒL SÍSKUR-TIM parā ēpzi

21 -- nu=(š)šan QATAM tianzi

§ 7

22 -- nu 1 NINDA.GUR4.RA GA.KIN.AK=ya paršiya

23 -- GEŠTIN=ya šipanti

24 -- nu kiššan tezzi

25 -- DUTU-i išḫāmi

26 -- kāša=wa=(t)ta parā tittanunun mantallīēš EMEḪÁ-eš

27 -- nu=wa=šmaš kāša kēdani U4-ti DUTU-i kattan EMEḪÁ aniyanzi

§ 8

28 -- nu MUNUSŠU.GI išnaš ALAMḪÁ 2 ALAM GIŠ TÚG waššanda

29 -- n=at=kan SAG.DUḪÁ=ŠUNU kariyanteš

30 -- n=uš ANA 2 BĒL SÍSKUR GÌRḪÁ-aš peran katta dāi

31 -- 2 ŠUḪÁ=ašmaš=kan 2 EMEḪÁ išnaš INA SAG.DU=ŠUNU dāi

§ 9

32 -- tueggaš=ašmaš=kan SÍG ZA.GÌN SÍG SA5 šūil anda iyazzi

33 -- n=at=šamaš=kan dāi

§ 10

34 -- nu SÍG mittan dāi

35 -- n=at=šamaš=kan IŠTU GÍR šer arḫa kuerzi

36 -- nu kiššan memai

37 -- apedani=wa=šmaš=kan U4-ti kuit ḫaššikkedumat

38 -- kinun=a=wa=šmaš=kan kāša apedaš U4-aš EMEḪÁ DĀndāliyaš IŠTU GÍR karašta

39 -- n=an=kan ḫaššī [pe]ššiyazzi

§ 11

40 -- nu MUNUSŠU.GI KU6 dāi

41 -- n=an=kan ANA 2 BĒL SÍSKUR [ta]kšan šer arḫa waḫnuzi

42 -- nu kiššan memai

43 -- kāš=wa KU6-uš arunaš GU4.MAḪ-aš

44 -- nu=wa=kan kāš KU6 māḫḫan arunaz tuḫḫuštat

45 -- kinun=a tuḫšandu [ap]edaš U4-aš EME[Ḫ]Á ḫūrtāuš

46 -- nu=kan KU6-un [ḫaš]šī peššiyazzi

§ 12

47 -- nu SÍG BABBAR SÍG GE6 dāi

48 -- n=ašta appuzzi anda ḫūlalizi

49 -- [n]=at=za tiššatwa ḫalzāi1

50 -- n=at ANA 2 BĒL SÍSKUR [šer] ēpzi

51 -- nu kiššan memai

52 -- KAU-it EME-it kuit memišketten2

53 -- kinun=a=wa kāša tiššatwa

54 -- [nu=wa=šm]aš=kan tuḫšan ēštu tueggaš apedaš [U4-aš] EMEḪÁ

55 -- n=at=kan ḫaššī peš[š]iyazzi

§ 13

56 -- nu MUNUSŠU.GI EGIR-anda MUN appuzzi [UZUSA] tarpatarpan DUḪ.LÀL dāi

57 -- nu DUḪ.LÀL EMEḪÁ iy[azzi]3

58 -- n=[at=kan AN]A 2 BĒL SÍSKUR SAG.DU=ŠUNU šer a[rḫa] waḫnuzi

59 -- [MUN=y]a=šmaš=kan appuzzi U[ZUSA tarpatarpan=(n)a] šer arḫa [waḫ]nuzi

60 -- nam[ma=šmaš=a]t parā [ēpzi]

61 -- n=at [GÙB-laz kiš]šara[z anda waḫnuwanzi]

§ 14

62 -- nu MUNUSŠU.GI kiššan memai

63 -- kuit=[wa=za=kan] kuit ištarna ḫūrzaketten

64 -- kin[un=a=wa] apuš ḫūrtauš EMEḪÁ DUTU-uš GÙB-la w[aḫnuddu]

65 -- n=at=kan ḫaššī peššiyazzi

§ 15

66 -- nu=kan ANA 2 BĒL SÍSKUR kuit SÍG [ZA.GÌ]N SÍG SA5 šūil tueggaš kitta

67 -- išnaš=ašm[aš k]uiēš 2 ALAM peran katta kianta

68 -- ŠUḪÁ išnaš=ma=(š)šan EMEḪÁ išnaš kue INA SAG.DUḪÁ=ŠUNU kianda

§ 16

69 -- n=at=šamaš=kan MUNUSŠU.GI arḫa dāi

70 -- nu=šmaš=kan [š]ūil arḫa tuḫšari

71 -- išnaš=a 2 ŠUḪÁ EMEḪÁ [MUNUSŠ]U.GI duwarnai

72 -- namma=šmaš=at šer a[rḫa waḫnuzi]

73 -- nu kiššan memai

§ 17

74 -- [tuḫš]aru apel U4-aš EMEḪÁ

75 -- tuḫšaru=wa [apel] U4-aš [ḫ]ūrtāuš

76 -- n=at=kan ḫaššī peš[šiyazzi]

§ 18

77 -- nu EGIR-a[nd]a [MUNUSŠU.GI IM?-a]n dāi

78 -- nu=(š)šan šer [arḫa 7 EMEḪÁ] iyazzi

79 -- n=aš=kan katta tarmāizzi

80 -- n=[aš=kan] ANA 2 BĒL SÍSKUR šer arḫa waḫnuz[i]

81 -- [nu kiššan] memai

82 -- ḫaššikketten kuedani [U4-ti]

83 -- [nu=wa kāša] apel U4-aš EMEḪÁ-eš

84 -- kinun=a=war=aš k[āša addāš] DUTU-uš tarmait

85 -- n=aš=kan ḫaššī d[āi]

§ 19

86 -- nu MUNUSŠU.GI wātar išnan=(n)a dāi

87 -- n=a[t=šamaš=kan] šarā papparašzi

88 -- n=aš šuppiyaḫḫi

89 -- [namma=šmaš=kan] išnan šer ar[ḫa] waḫnuzi

90 -- nu kiššan memai

91 -- parkuwaēš=wa=šmaš namma ēšten KA×U-it EME-it

92 -- nu=kan išnan ḫaššī dāi

§ 20

93 -- nu UDU ūnnanzi

94 -- n=an=kan MUNUSŠU.GI ANA 2 BĒL SÍSKUR šer ēpzi

95 -- nu kiššan tezzi

96 -- kāša=wa=šmaš tarpalliš

97 -- nu=wa=šmaš tueggaš tarpalliš ēštu

98 -- KA×U-i EME-i ḫūrtāuš

99 -- nu=(š)ši=kan iššī anda allapaḫḫanzi

100 -- nu kiššan memai

§ 21

101 -- idālauēš=wa=kan ḫūrtāuš parā allapaḫten

102 -- nu tēkan paddanzi

103 -- nu=kan UDU kattanda ḫattanzi

104 -- namma=an=kan katt[a]nda tianzi

105 -- nu=(š)ši NINDA.GUR4.RA KU7 awan katta tianzi

106 -- GEŠTIN=ya šipanti

107 -- nu šer anda appanzi

§ 22

108 -- nu UDU GE6 ūnnanzi

109 -- n=an=šamaš=kan MUNUSŠU.GI šer ēpzi

110 -- nu kiššan memai

111 -- SAGḪÁ=ašmaš tueggaš ḫūmandāš tarpalliš UDU GE6

112 -- KA×U-i EME-i ḫūrtauš=(š)a EGIR-an

§ 23

113 -- n=an=šamaš=kan šer arḫa waḫnuzi

114 -- nu=(š)ši=kan 2 BĒL SÍSKUR iššī anda allapaḫḫanzi

115 -- nu UDU ḫattanzi

116 -- namma=an arḫa ḫappešnānzi

117 -- nu GUNNI iyanzi

118 -- n=an arḫa warnuwanzi

119 -- LÀL=ya=(š)ši=kan Ì SERTUM pittalwan šer lāḫuwanzi

120 -- NINDA.GUR4.R[A] KU7 par[ši]ya

121 -- n=an=kan ḫaššī peššiyazzi

122 -- GEŠTIN=ya šipanti

§ 24

123 -- nu MUNUSŠU.GI ŠAḪ.TUR dāi

124 -- n=an=šamaš=kan šer ēpzi

125 -- nu kiššan mem[ai]

126 -- kāša=war=aš Ú-it ḫalkit warkanza

127 -- nu=wa=z kāš [EGI]R nepiš UL aušzi

128 -- āppa=ma=wa=z=kan ŠAḪ.TURḪ[Á] UL aušzi

129 -- nu kūš=a BĒL SÍSKUR idālauēš ḫurtauš QĀTAMMA lē uwanzi

§ 25

130 -- nu=šmaš=kan ŠAḪ.TUR šer arḫa waḫnuwanzi

131 -- namma=an=kan kunanzi

132 -- nu tēkan paddanzi

133 -- n=ašta ŠAḪ.TUR5 kattanda tianzi

134 -- nu=(š)ši NINDA.GUR4.RA KU76 awan katta [ti]anzi

135 -- GEŠTIN=ya7 šipanti

136 -- nu tēkan šer anda appanzi

§ 26

137 -- nu MUNUSŠU.GI IM ḫupuwāi8 iyazzi

138 -- nu=kan išnan tepu anda dāi

139 -- kappani=ya=ka[n] GE6 anda [šuḫ]ḫāi9

§ 27

140 -- n=at=ka[n MUNUSŠU.GI ANA 2] BĒL SÍSKUR šer arḫa waḫnuzi

141 -- nu kiššan memai

142 -- kāš=wa [IM-aš] māḫḫan wappui EGIR-pa UL11 [paizzi]

143 -- kappani=ya=wa ḫarkīēšzi UL

144 -- nu=war=at=z[a] damai NUMUN-an UL kišari

145 -- išnaš=ma=wa=kan kāš DINGIRMEŠ-aš NINDAḫarši UL paizzi

146 -- kēdaš=a=wa=(š)šan idāluš lālaš QĀTAMMA tuēkki lē paizzi

§ 28

147 -- nu MUNUSŠU.GI ḫarziyallan dāi

148 -- nu=(š)ši=kan SÍG ZA.GÌN SÍG SA5 anda ḫūlāliyazzi

149 -- n=an=kan ANA 2 BĒL SÍSKUR šer arḫa waḫnuzi

150 -- nu kiššan memai

§ 29

151 -- [karapdu=wa pidd]alliš GÌR-aš idālun EME-an

152 -- [nu=war=an iškiša]z karapdu

153 -- ZU9=ya=war=at karapdu idālu KA×U-iš idālu EME-an

§ 30

154 -- [EGIR-anda=ma=za UR.TUR d]āi

155 -- n=an=kan A[N]A 2 BĒL SÍSKUR [šer arḫa waḫnuz]i

156 -- nu kiššan m[em]ai

157 -- tarpalliš=wa [t]uegg[aš ḫūma]ndāš

158 -- nu=(š)ši=kan i[šš]ī anda all[apaḫḫanz]i

159 -- nu kiššan tezzi12

160 -- parā=war=an=kan allapaḫten apel U4-aš ḫurtiyaš

161 -- nu=kan UR.TUR kunanzi

162 -- namma=an ḫariyanzi

§ 31

163 -- nu=kan MUNUSŠU.GI ANA 2 BĒL SÍSKUR wātar šarā papparašzi

164 -- n=aš13 parkunuzi

165 -- [i]šnan=a=šmaš=kan šer arḫa waḫnuzi

§ 32

166 -- EGIR-anda=ma IM-aš išnūrin iyazzi

167 -- n=ašta Ì-an anda lāḫui

168 -- SÍG SA5=ya=kan14 anda peššiyazzi

169 -- karaš=kan anda šuḫḫāi

170 -- n=at MUNUSŠU.GI ANA 2 BĒL SÍSKUR TÚGšeknuwaš kattan ēpzi

171 -- nu kiššan memai

§ 33

172 -- kāša=wa ŠA D[IŠTA]R išnūriš

173 -- nu=wa=šmaš āššui TI-anni parā tarnan ḫardu

174 -- idālaui=ma=wa=šmaš=kan uddanī QĀTAMMA munnāiddu

§ 34

175 -- EGIR-anda=ma 7 DUGḫupuwai dāi

176 -- n=at=kan GEŠTIN-it Ì SERTUM pittalwanit LÀL šunnai

177 -- GIŠPÈŠ GIŠGEŠTIN ḪÁD.DU.A UZUSA MUN appuzzi anda dāi

178 -- nu=kan MUNUSŠU.GI DUGḫupuwaya ḫaššī anda laḫuškezzi

179 -- DUGḫupuwaya=ma tuwarniškezzi15

§ 35

180 -- nu kiššan memiškezzi

181 -- tuwarnattaru=war=at DUGḫupuwaya KA×U-it EME-it

182 -- nu māḫḫan DUGḫupuwaya tuwarniškezzi

183 -- 7 NINDA.SIG=ya paršiyannai

184 -- n=aš=kan ḫaššī and[a p]eššiškezzi

§ 36

185 -- nu UDU ūnnanzi

186 -- [n=an=za n]akkuššin ḫalziššai

187 -- nu=za MUNUSŠU.GI NINDA.GUR4.R[A] KU7 tar[n]aš DUGKUKU GEŠTIN=ya dāi

188 -- nu UDU DUTU-i ḫikzi

189 -- [nu MUNU]SŠU.GI kišša[n memai]

190 -- DUTU-i kāša=wa=[š]maš nakkuššiš [KA×U-it EME-it]

191 -- nu=kan UDU šipan[t]i

192 -- NINDA.GUR4.RA=ya [paršiya]

193 -- GEŠTIN=ya šipanti

194 -- UDU=ma=kan UL kunanzi

195 -- n=an=za MUNUSŠU.G[I=pat dāi]

§ 37

196 -- nu=za MUNUSŠU.[GI 7 GAG]ḪÁ URUDU dāi

197 -- NINDA.GUR4.RA [KU7=ya=za tarnaš] 1 GA.KIN.AK [1 DUGKUKUB GEŠTI]N dāi

198 -- nu NINDA.GUR4.RA G[A.KIN.AK=ya] DUTU-i paršiya

199 -- [GEŠTIN=ya] šipanti

200 -- namma [7 GAGḪÁ URUDU] dāi

201 -- nu tekan [tarmāiz]zi

202 -- nu kišša[n memai]

203 -- tarmān=war=at ēštu [KAx]U-it EME-it D[UTU-i kattan]

§ 38

204 -- EGIR-anda=ma MUNUSŠU.GI NINDA.GUR4.R[A 1] GA.KIN.AK GA[L GEŠTIN=ya dāi]

205 -- [n]u ANA 2 BĒL SÍSKUR parā [ē]pzi

206 -- nu=[(š)šan Q]ATAM tianzi

207 -- nu MUNUSŠU.GI NINDA.GU[R4.RA GA.KIN.AK=ya] DUTU-i paršiya

208 -- GEŠTIN=ya šipanti

209 -- nu kiššan tezzi

210 -- šarlānza=wa DUTU-uš KA×U-i EME-i EGIR-ŠU

§ 39

211 -- [n]u paḫḫur ZAG-az GÙB-laz=(zi)ya warnuwanzi

212 -- [n]u=kan ištarna 7 NA4ḫuwaši išgaranzi

213 -- [nu] MUNUSŠU.GI NINDA.GUR4.RA KU7 tarnaš GAL GEŠTIN=ya ANA 2 BĒL SÍSKUR [par]ā ēpzi

214 -- nu=(š)šan QATAM tianzi

215 -- [nu] MUNUSŠU.GI NINDA.GUR4.RA KU7 paršiyazzi

216 -- [GEŠTIN]=ya šipanti

217 -- nu kiššan memai

§ 40

218 -- [kuiš=war=at uetešket NA4ḫuwāšiḪÁ tānita]

219 -- [kinun=a=war=at=kan kāša lagāri]

220 -- [nu=wa=kan ANA 2 BĒL SÍSKUR apēdani U4-ti kuit KA×U-az EME-az uit]

221 -- nu=wa=[kan a]pē uddā[r QĀTAMMA lāgāru]

§ 41

222 -- nu=kan 2 BĒL SÍSKUR NA4ḫ[uw]a[š]iḪÁ GÌRḪÁ-az [šuenzi]

223 -- n=aš=kan paḫḫur ištarna ar[ḫ]a paizzi

224 -- nu TÚG[NÍG.LÀMMEŠ] kue waššan ḫarkanzi

225 -- n=at=za arḫa peššiyanz[i]

226 -- [n]=at=za MUNUSŠU.GI dāi

§ 42

227 -- [nu]=šmaš=kan DUGÚTUL šer arḫa waḫnuzi

228 -- DUGDÍLIM.GAL=[ma=šmaš GÌRḪ]Á-aš kattan dāi

229 -- nu kiššan memai

230 -- kāša=wa16 DUGÚTUL SAG.DU=KUNU tarpalliš

231 -- k[āša=wa] DUGDÍLIM.GAL

232 -- nu=wa=šmaš17 ḫūmanda uddār IŠTU GÌRḪÁ=KUNU ar[teni]

233 -- nu DUGÚTUL MUNUSŠU.GI tuwarnizzi

234 -- DUGDÍLIM.GAL=ma 2 BĒ[L SÍS]KUR GÌR-it18 tuwarnanzi

235 -- nu kiššan memai

236 -- tuwarnattaru=war=at ḫūmanda uddār ḫurtāuš=(š)a

§ 43

237 -- nu MUNUSŠU.GI DUTU-aš uelku dāi

238 -- n=at=za tiwariya ḫalziššai

239 -- nu 2 [B]ĒL SÍSKUR tuekkuš warši

240 -- nu kiššan memai

241 -- katta=war=ašmaš=kan : waršan ēštu idālu uddār KA×U-aš EME-aš

§ 44

242 -- nu MUNUSŠU.GI wātar GAL-az našma ḫūpparaz ANA 2 BĒL SÍSKUR parā ēpzi

243 -- NA4nitri=ya=kan anda šuḫḫan

244 -- nu=za=kan 2 BĒL SÍSKUR wātar INA SAG.DU=ŠUNU šarā lāḫuwanzi

245 -- ŠUḪÁ=ya=za=kan IGIḪÁ arranzi

§ 45

246 -- namma=kan wātar ANA SI.GU4 anda laḫuwanzi

247 -- n=at 2 BĒL SÍSKUR šer šiyanzi

248 -- nu MUNUSŠU.GI kiššan memai

249 -- kuwapi=wa karūilēš LUGALMEŠ EGIR-pa uwanzi

250 -- nu=wa=z KUR-e šaklin=(n)a EGIR-an kappūwanzi

251 -- kī=y[a=wa] NA4KIŠIB apiyakku niniktaru

§ 46

252 -- DUB.1.KAM QATI AWAT fMaštigga MUNUS URUKizzuwatni19

253 -- mān=kan ABU DUMU-RU=ya našma MUTU DAM=ZU=ya naššu=ma ŠEŠ NIN=ya ḫallūwanzi

254 -- n=uš takšan kuwāpi [a]nda tittanumi

255 -- n=aš takšan aniyami

256 -- n=aš kiššan aniyami